kalava fayz-m

Kalava ishlab chiqarish

FAYZ-M klasterining ip-kalava ishlab chiqarish bo‘limi — bu sanoat zanjirining texnologik asosini tashkil etuvchi yirik va muhim bo‘g‘inlardan biridir. 2023-yilda mazkur bo‘lim Prezident qaroriga muvofiq xorijiy investitsiyalarni jalb etish doirasida Shveysariyaning mashhur RIETER kompaniyasi bilan hamkorlikda to‘liq ishga tushirildi. Loyihaning umumiy qiymati 15 million AQSH dollari bo‘lib, shundan 12 million dollari bank krediti, qolgan 3 million dollari korxonaning o‘z mablag‘lari hisobidan moliyalashtirildi. Ushbu investitsiya hisobiga zamonaviy ishlab chiqarish korpusi qurilib, ilg‘or texnologiyalar bilan jihozlandi. Yiliga 5 400 tonna gribinnoy kalava ip ishlab chiqarish quvvatiga ega ushbu fabrika, klasterning to‘qimachilik bo‘limini sifatli va barqaror xomashyo bilan ta’minlaydi. Kalava iplar xalqaro standartlarga mos ravishda ishlab chiqariladi va keyingi bosqichlarda — mato to‘qish, trikotaj va tikuvchilikda — asosiy material sifatida ishlatiladi. Zavodning ahamiyati shundaki, u klasterning ichki resurslari doirasida uzluksiz xomashyo zanjirini yaratib, tashqi bozor va importga bo‘lgan ehtiyojni kamaytiradi. Shu bilan birga, sifat nazorati to‘liq ichki jarayonda amalga oshirilgani sababli, yakuniy mahsulotning mustahkamligi va xalqaro bozorlarga chiqish imkoniyati ortadi. Fabrikada 300 nafar ishchi faoliyat yuritmoqda. Ishlab chiqarish liniyalari to‘liq avtomatlashtirilgan bo‘lib, inson omiliga bog‘liq xatoliklarni kamaytirish, samaradorlikni oshirish va barqaror ishlab chiqarishni ta’minlashga xizmat qiladi. Bu bo‘lim nafaqat sanoat salohiyatini oshiradi, balki mintaqadagi bandlik va kasbiy rivojlanishga ham sezilarli hissa qo‘shadi.